Ka gjetur kohë të reagojë pas më shumë se 24 orësh ministrja e Turizmit Mirela Kumbaro për atë që ndodhi në plazhin e Potamit në Himarë.
Në një postim në Twitter ajo thotë se ngjarja është e rëndë duke bërë përgjegjës personin që kreu krimin.
“Tejet e rëndë dhimbja për ngjarjen e kobshme në bregdetin e Himarës, ku një engjëll nuk është më mes nesh për shkak të marrëzisë së një njeriu që theu çdo ligj, çdo rregull e çdo normë me pasoja tragjikisht të pakthyeshme!
Me vetëdijen se nuk ka fjalë të shërbejë sado pak si ngushëllim për prindërit, familjen për gjëmën që pësuan, kërkesa shkon për Drejtësinë që të bëjë punën e saj, pa asnjë kompromis, me dënim maksimal ndaj kujtdo që thyen ligjet e përbashkëta dhe rregullat dhe rrezikon të shkaktojë humbje jete, në tokë a në ujë qoftë!
Kërkesa shkon edhe për Policinë e Shtetit po ashtu, për çdo punonjës të saj në territor, që të jetë në lartësinë vigjiluese dhe ndëshkuese që uniforma i imponon për kryerjen e detyrës. Jonada e vogël u prehsh ne paqe?” – shkruan ministrja që nuk thotë asnjë fjalë për kërkesën e opozitës e cila i kërkon asaj dorëheqjen.
