Deputeti i Partisë Demokratike, Dashnor Sula ka akuzuar kryeministrin Edi Rama se në një kohë që ai ka marrë pushimet “në sarajet e tij”, korrupsioni vijon të dëmtojë vendin.
Duke iu referuar raportit më të fundit të Departamentit Amerikan të Shtetit, Sula thekson se janë përkeqësuar treguesit ekonomik të Shqipërisë në 10 vitet e fundit prej korrupsionit endemik në administratën shtetërore, në gjyqësor dhe konkurencës së pandershme.
Sipas deputetit të selisë blu, të ardhmen në Shqipëri e shohin vetëm 4-5 klientët kryesore që përfitojnë nga tenderët dhe koncesionet e qeverisë, dhe trafikantët e drogës.
Postimi i Dashnor Sulës:
Qeveria e regresit!
Sulltani ka ditë që nuk po ndihet. Ka marrë pushimet e ka shkuar në sarajet e tija. Por korrupsioni vazhdon. Kryeministri mendon se do ta kalojë në heshtje, por e siguroj se gabon rëndë. Situata është tejet e rendë dhe për këtë përgjegjësi të drejtëpërdrejtë ka qeveria. Në mënyrë të vazhdueshme kam denoncuar në bazë të informacioneve dhe fakteve, korrupsionin dhe politikat dashakeqëse të kësaj qeverie. Kanë qenë me fakte.
Nuk kam pasur dyshim për ato qe kam denoncuar bashkë edhe me shumë nga kolegët e mi të opozitës. Por sot po reagoj sepse të gjitha ato që kemi denoncuar ditë pas dite u konfirmuan edhe nga raporti i DASH.
Departamenti Amerikan i Shtetit, etaloni i së vërtetës publikoi mbrëme Raportin për korrupsionin dhe përceptimin e të bërit biznes.
Korrupsioni endemik në administratën shtetërore, në gjyqsor, ekonomia informale, konkurenca e pandershme ishin disa nga shqetësimet që përshkruheshin për vendin tonë.
Në 10 vite qeverisje të SULLTANIT treguesit vetëm janë përkeqësuar. Por sërish Kryeministri përgjegjësinë e hedh diku tjetër. Me siguri edhe për këtë Raport Rama do thotë se është “copy paste” nga viti i kaluar. Por në fakt e vërteta është se nuk ështe copy paste, sepse treguesit janë përkeqësuar.
Në Shqiperi biznesi i ndershëm e ka çdo ditë e më shumë të vështirë që të mbijetojë. Këtu po ecin vetëm 3-4 klientët e qeverisë dhe ata që po pastrojnë paratë e kokainës. Para pak ditës e pam sesi bosi i drogës që u kap në Spanjë kishte marrë tendera publik në Shqipëri. Trafikanti u godit nga autoritetet e Spanjës sepse këtu ai ishte biznesmen i nderuar me tendera rindërtimi e ndërtues pallatesh.
Dje në Zërin e Amerikës e konfirmoi edhe kreu i SPAK, z. Kraja kur tha se bandat jane të fuqishme ekonomikisht dhe se po pastrojnë paratë. Ata janë të fuqishëm sepse gëzojnë mbrojtje politike. Sepse kanë hedhur lekë për të blerë vota për të mbajtur SULLTANIN në pushtet. Kryeministri e pranoi bashkëpunimin me ta dhe tani smund të shkëputet dhe as nuk mund ti luftojë. Ndaj e vetmja rrugë është largimi një orë e më parë e kësaj qeverie.
Më poshtë janë disa nga gjetjet e DASH
Investitorët e huaj e perceptojnë Shqipërinë si një vend të vështirë për të bërë biznes.
• Raportimet për korrupsion në prokurimet qeveritare janë të zakonshme.
• Sfidat e vazhdueshme për investimet dhe biznesin në Shqipëri janë korrupsioni endemik, përfshirë gjyqësorin dhe prokurimet publike, konkurrencën e pandershme zbatimin e dobët të kontratave.
• Problem mbetet ekonomia informale dhe ndryshimet e shpeshta të legjislacionit fiskal. Përdorimi i vazhdueshëm i kontratave të partneritetit publik privat (PPP) ka reduktuar mundësitë për konkurrencë, përfshirë nga investitorët e huaj, në infrastrukturë dhe sektorë të tjerë.
• Analizat e dobëta kosto-përfitim dhe mungesa e ekspertizës teknike në hartimin dhe monitorimin e kontratave PPP janë shqetësime të vazhdueshme.
• Investitorët amerikanë sfidohen nga korrupsioni dhe përjetësimi i praktikave informale të biznesit.
• Disa investitorë nga SHBA janë përballur me mosmarrëveshje tregtare të diskutueshme si me entet publike ashtu edhe me ato private dhe disa shkuan në arbitrazh ndërkombëtar.
• Ka pasur raste të individëve që dyshohet se kanë manipuluar sistemin gjyqësor për të marrë tituj të paligjshëm të tokës.
• Mbivendosja e titujve të pronësisë është një çështje serioze dhe e zakonshme.
• Procesi i kompensimit për tokat e konfiskuara nga ish-regjimi komunist vazhdon të jetë joefikas dhe i pamjaftueshëm.
