Nënkryetari i Partisë Demokratike, Luçiano Boçi, ka reaguar në rrjete sociale për rritjen e çmimit të naftës nga kryeministri Edi Rama.
Boçi shprehet se arsyeja pse kryeministri Rama rriti çmimin e naftës është qëllimi për të grabitur emigrantët pasi kërkesa për karburant në këtë periudhë është dyfishuar.
Ndër të tjera Boçi thekson se përfitojnë qeveritarët dhe bosat e PPP-ve. Sakaq, nënkryetari i PD deklaron se ata që zhvaten e grabiten janë ata që nuk firmosin në asnjë bordero të bordellos-shtet, emigrantët patriotë dhe qytetarët e thjeshtë.
Statusi
ÇMIM PËR TË ZHVATUR EMIGRANTËT E QYTETARËT
Ka një arsye themelore që çmimi i naftës në Shqipëri rritet e nuk u ul asnjëherë, përkundrejt rënies së tij në bursa.
Arsyeja është sa e thjeshtë aq dhe kanibaleske.
Kjo është periudha kur sasia e mjeteve në qarkullim dyfishohet dhe kërkesa për karburant gjithashtu, sepse emigrantët e shumtë kthehen në vendlindje dhe me pushime.
Grabitqari këtë rast pret për të sulmuar prenë e vet. Rama këtë ka pritur për të rrjepur emigrantët e qytetarët!
E shndërron sentimentin njerëzor të mallit për vendin, në mall për fitimin e vet marramendës. Me keq se e turpshme!
Kështu biznesi i tij qeverisës, arkëton miliona euro nga xhepat e njerëzve që i kanë me djersë e gjak, por që dihet si përfundojnë.
Përfundojnë në llogaritë e qeveritarëve dhe “bosave” të PPP-ve.
Ndërkohë oligarkët e karburanteve marrin pjesën e tyre me një fitim marramendës. Ndërsa ata që zhvaten, grabiten më shumë me borde e pa borde, janë ata që nuk firmosin në asnjë bordero të bordellos-shtet, emigrantët patriotë dhe çdo qytetar i thjeshtë i këtij vendi.
