Vijon të tensionohet më tej situata në veri të Kosovës, me barrikadat që po pengojnë prej 2 javësh tashmë lëvizjen e lirë të qytetarëve drejt pikave kufitare.
Një barrikadë e re është vendosur në orët e para të mëngjesit në Lagjen e Boshnjakëve, në Mitrovicë të Veriut, ndonëse partnerët ndërkombëtarë iu kanë bërë thirrje të dyja palëve që të ulin tensionet dhe të largojnë pengesat.
Rruga ku është vendosur barrikada është një prej akseve që lidh Mitrovicën e Veriut me atë të Jugut.
Po ashtu, ka informacione që është ngritur edhe një barrikadë tjetër në vendin e njohur si “Dudin Kërsh” në Zveçan, që pamundëson lëvizjen nga Mitrovica e Jugut në drejtim të Rudarës, Komuna e Zveçanit.
Barrikadat e tjera janë të vendosura kryesisht më 10 dhjetor në rrugët që çojnë drejt pikëkalimeve kufitare Jarinjë dhe Bërnjak që lidhin Kosovën dhe Serbinë, pas arrestimit të një ish-efektivi serb për sulmi ndaj zyrave të KQZ.
Një ditë më parë, Kryeministri Kurti takoi kreun e KFOR dhe të EULEX dhe kërkoi ndërhyrjen e tyre për largimin e barrikadave, në të kundërt sipas kreu të qeverisë, Policia e Kosovës i ka të gjitha kapacitetet për heqjen e tyre.
