Kosova përkujton sot 24-vjetorin e Masakrës së Reçakut, ku u vranë mbi 45 civilë të pafajshëm shqiptarë, që do të sillte reagimin e fuqishëm të ndërkombëtarëve të cilët e cilësuan masakrën si krim kundër njerëzimit. Dhe në nder të viktimave në të gjitha sheshet dhe dritaret e shtëpive të Kosovës do të ndizen qirinj në mbrëmje.
Në përkujtim të viktimave të gjenocidit serb në Kosovë, në të gjithë vendin këtë të dielë do të ndizen qirinj Me rastin e Ditës së Përkujtimit të Gjenocidit në Kosovë, Qendra “Gjenocidi në Kosovë – Plagë e Hapur” fton të gjithë shqiptarët që duke filluar nga ora 19:30 të bëjnë ndezjen e qirinjve në shenjë respekti e përkujtimi për viktimat e gjenocidit në Kosovë, ndërsa aktivistët do të ndriccojnë sheshin “Skënderbeu” në Prishtinë.
Organiziatorët i ftojnë qytetarët e qyteteve tjera, me vetiniciativë mund ta bëjnë ndezjen e qirinjve në sheshet kryesore të qyteteve dhe të fshatrave të tyre.
Ata që nuk kanë mundësi të dalin në shesh, këtë mund ta bëjnë në ballkonet apo dritaret e tyre.
Po ashtu, janë ftuar të gjithë shqiptarët anekënd botës që në ora 19:30, sipas kohës së tyre lokale, ta bëjnë ndezjen e qirinjve në ballkone e dritare në nderim të viktimave të gjenocidit në Kosovë.
“Përkujtimi i viktimave të Gjenocidit në Kosovë është më e pakta që ne duhet të bëjmë në rrugëtimin për ngadhënjimin e drejtësisë dhe ndëshkimin e krimit!”, thone organizatoret e kesaj perkujtimoreje.
Në 15 janar të vitit 1999, në fshatin Reçak u vranë e u masakruan barbarisht 45 shqiptarë të paarmatosur nga trupat serbe.
Sipas dëshmitarëve, aty rreth orës 6:30 forcat serbe me artileri të rëndë kanë filluar të bombardojnë fshatin. Pas ndërprerjes së bombardimeve, forcat serbe u futën në fshat dhe kanë filluar bastisjet.
Masakra e Reçakut tmerroi botën dhe zgjoi ndërgjegjen e diplomacisë botërore duke u mobilizuar për Kosovën. Tmerret e shkaktuara në fshatin Reçak sollën në vëmendje të gjithë botën e civilizuar dhe shpalosi të vërtetën rreth planit të ish-kriminelit Sllobodan Millosheviç.
Pas Reçakut, çështja e Kosovës do të trajtohej në një konferencë ndërkombëtare në Rambuje e në Paris, mossuksesi i së cilës do të ndikonte në ndërhyrjen e trupave të NATO-së kundër forcave ushtarake serbe, largimin e tyre nga Kosova dhe vendosjen e administratës ndërkombëtare në Kosovë.
