Zëdhënësja e fushatës së PD në Tiranë: “Duke filluar që nga mbledhja e taksave, nga mirëmenaxhimi dhe dëshira për të punuar, gjithçka është e mundur për t’u zgjidhur dhe Belind Këlliçi këtë e ka prioritet. Nëse kemi shembuj të mirë në botë, mund ta bëjmë edhe ne.”
Znj. Silvi Bardhi, zëdhënësja e fushatës së Partisë Demokratike për bashkinë e Tiranës, ka shpjeguar sot në emisionin Kafe Shqeto në SYRI TV, se si planifikon t’i zgjidhë kandidati Belind Këlliçi, në veçanti, problemet e mprehta të arsimit në kryeqytet, duke filluar që nga mungesa e institucioneve arsimore përtej qendrës, tek eliminimi i turneve të mësimit dhe deri tek heqja e taksës zhvatëse për arsimin, që e rrëmben bashkia e drejtuar nga socialisti Erion Veliaj.
Por, zëdhënësja e fushatës gjithashtu demaskoi përpjekjet e PS-së në një shkollë të mesme të Tiranës për të blerë deri edhe votat e maturantëve, në këmbim të notave.
Kafe Shqeto: Znj. Bardhi, si paraqitet situata e mësimit me turne në Tiranë?
Silvi Bardhi: Gjysma e shkollave, si të mesme, por edhe fillore janë me këtë problematikë. Kemi fëmijë që shkojnë në shkollë, orareve të papërshtatshme për familjet shqiptare dhe e dimë që përballohen me mundësi shumë të pakta për sa i përket edhe menaxhimit të kohës, sepse janë në punë e kanë dhe problematika të tjera. Këtë shqetësim e kemi ngritur gjithmonë gjatë fushatës, por që menduam ta kthejmë në vëmendje sepse e kemi shqetësim nga vet qytetarët. Pra, kur ata vijnë dhe ankohen, kanë denoncimet e tyre, thonë se duhet që të diskutohet edhe për çështjen e shkollave sepse është një problematikë që na prek të gjithëve e duhet të marrë zgjidhje. Erion Veliaj ka shtatë vjet që ka premtuar se do ta eliminojë këtë fenomen, pra, të shkollave me turne, por e vërteta është se ekziston sërish kjo problematikë.
Belind Këlliçi, kandidati për bashkinë e Tiranës, ka zgjidhje dhe në pikën e tij të programit, ai mendon se asnjë lagje dhe asnjë zonë e Tiranës, i gjithë qarku i Tiranës, nuk do të jetë më pa asnjë shkollë, pa asnjë kopsht e çerdhe.
Ne e dimë që problematika kryesore është në zonën e Astirit dhe në Liqenin e Thatë. Janë 130 mijë qytetarë banorë që nuk kanë asnjë shkollë, asnjë kopsht, asnjë çerdhe dhe sot është kujtuar Erion Veliaj të thotë që aty do të ndërtojë shkolla dhe çerdhe, në momentin që Belind Këlliçi e ngre si problematikë, si shqetësim dhe si denoncim të tij. Pra, ka reagim nga Erion Veliaj në momentin që opozita është në fushatë dhe i evidenton këto probleme!
Kafe Shqeto: Znj. Bardhi, këta fëmijë që nuk qarkullojnë në oraret mbi të cilat ndërtohet jeta e përditshme, çfarë kostosh kanë krijuar për prindërit? Ata që kanë konstatuar me ju.
Silvi Bardhi: Mua më rikthen në vitin 1995, kur unë vet e kam përjetuar mësimin me dy turne dhe nuk është se ka pasur rezultat, për vetë faktin se ne ishim në një shkollë që nuk i përkisnim, nuk ishim në klasën tonë, në ambientet tona, nuk ishim në habitatin tonë për të mësuar. Normalisht, nuk e ke fokusin dhe nuk ke as seriozitetin për të vazhduar mësimin, sidomos kur mësimi bëhet në orarin e pasdites, kur nuk je i fokusuar, nuk ke vëmendjen e duhur. Për këtë mund të flasë shumë mirë edhe një psikolog; ata psikologë që punësohen në shkolla duhet ta ngrenë këtë shqetësim, sepse ata e shohin përditë se si funksionon me nxënësit.
Por ajo që më shqetëson më shumë është një denoncim që neve na ka ardhur në shtabin tonë për maturantë që mbarojnë tani dhe u janë afruar nga një shkollë e mesme (për ata maturantë që nuk janë mirë në mësime janë afruar më shumë), janë afruar nga Partia Socialiste për t’i ndihmuar dhe më pas për t’i kaluar në maturë në këmbim të votës!
Kafe Shqeto: Duket se po ndikon edhe te maturantët propaganda elektorale.
Silvi Bardhi: Ata janë duke shfrytëzuar këtë anë të këtyre maturantëve duke iu afruar, duke iu kërkuar edhe dokumentin e identifikimit e në fund për të kaluar maturën. Ky është një denoncim që sigurisht, kush mund ta thotë sot nën terrorin e Erion Veliajt dhe të qeverisë, apo jo?! Pra, kush mund ta thotë në kamera?! Unë detyrohem që ta denoncoj në këtë formë për vet faktin se ata janë të terrorizuar, janë vet nxënës të cilët, nga familjet e tyre mund të kenë bindje të majta dhe e kanë denoncuar tek ne këtë fakt.
Kafe Shqeto: Znj. Bardhi, po si e zgjidh premtimi i Belind Këlliçit, cila është strategjia që ne të dalim nga mësimi me turne?
Silvi Bardhi: Gjithçka nis nga mirëmenaxhimi i parasë publike, mirëmenaxhimi i taksave të qytetarëve, ndërkohë që kemi miliona euro, mbi 41 milionë euro, të mbledhura për arsimin, taksë arsimi, e cila paguhet nga unë, ju, të gjithë ne, biznesi, pra nga të gjitha këto taksa që ne paguajmë dhe paratë nuk e dimë se ku shkojnë, e para, taksa e arsimit do të eliminohet, nuk do të paguhet më. Duke filluar nga kjo, nga mbledhja e taksave, nga mirëmenaxhimi dhe dëshira për të punuar, gjithçka është e mundur për t’u zgjidhur dhe Belind Këlliçi këtë e ka prioritet. Pra, ka ardhur për t’u shërbyer qytetarëve dhe për t’i bërë gjërat siç duhet për Tiranën; çdokund është e mundur. Nëse kemi shembuj të mirë në botë, mund ta bëjmë edhe ne./ar.sh/SYRI.NET
