Koalicioni “Bashkë Fitojmë” ka vijuar turin në kuadër të zgjedhjeve lokale në Kurbin, ndërkohë që na ndajnë vetëm pak ditë nga 14 maji.
Kryetari i Partisë së Lirisë Ilir Meta, në fjalën e tij u shpreh se në vetëm 3 ditë, kjo bashki do u kthehet qytetarëve, ndërsa shtoi se në 14 maj do të marrë fund arroganca dhe monizmi absolut.
Meta shtoi se e vetmja garë që kandidati për Kurbinin Behar Haxhia ka, është ajo me kandidatët e tjerë të opozitës, se cili prej tyre do të marrë rezultatin më të lartë kundër Rilindjes.
“Edhe tre ditë dhe Bashkia e Kurbinit do u takojë qytetarëve. Do t’i japë fund 4 vjeçarit të bashkisë bunker të Kurbinit, e do ta hapë për qytetarët pa dallim.
Kryetari i ardhshëm i bashkisë, kandidati ynë, do sjellë transparencën në vend të korrupsionit.
Qytetarët nuk do intimidohen më as nga fatkeqësi si ajo e tërmetit, ku fondet u përdorën për të blerë kolltuqe zyrash.
Kryetari i ardhshëm do të marrë çdo vendim në interesin tuaj dhe të komunitetit.
Në 14 maj merr fund monizmi absolut dhe arroganca absolute.
E vetmja garë që ka Behar Haxhiu është ajo me kandidatët tanë në bashki të tjera, se kush do të dërrmojë më shumë bandën e Rilindjes”, tha Meta.
