Kandidati për zgjedhjet e ardhshme presidenciale në Ekuador, Fernando Villavicencio është ekzekutuar gjatë një tubimi të fushatës. Ish anëtari i asamblesë kombëtare të vendit u qëllua me tri plumba teksa po largohej nga ngjarja në veri të vendit në Kuito të mërkurën.
Një prej anëtarëve të ekipit të tij në fushatë u tha mediave se viktima ishte duke hipur në makinë dhe një burrë i doli përpara dhe e qëlloi në kokë tre herë.
Policia arriti të qëllojë edhe agresorin i cili ndërroi jetë ndërsa u arrestuan 6 të dyshuar. Si pasojë e kësaj ngjarjeje të rëndë janë plagosur nëntë persona, duke përfshirë një kandidat për asamble dhe dy policë.
Raundi i parë i zgjedhjeve presidenciale është planifikuar të mbahet më 20 gusht.
Presidenti aktual Lasso, i cili nuk do të jetë në fletën e votimit, tha se ishte i indinjuar dhe i tronditur nga vrasja, duke shtuar se ata që shkelin ligjin do ndëshkuar.
“Krimi i organizuar ka bërë një rrugë të gjatë, por pesha e plotë e ligjit do të bjerë mbi ta“.- tha ai.
Aktualiteti në Ekuador
Krimi dhe prania e kartelave të drogës në Ekuador vjen gjithnjë e më shumë në rritje gjatë viteve të fundit, duke e kthyer në një ndër retorikat kryesore të fushatave presidenciale të këtij viti por edhe të politikës në tërësi. Muajin e kaluar, Lasso shpalli gjendje të jashtëzakonshme dhe shtetrrethim natën në tre provinca pas një numri vrasjesh të lidhura me krimin e organizuar.
Përveç sigurisë, fushata e Villavicencio ishte fokusuar në luftën e korrupsionit, një temë që ai e kishte mbuluar në një karrierë të mëparshme si gazetar si dhe për mbrojtjen e mjedisit.
Javën e kaluar, ai tha se ai dhe ekipi i tij ishin kërcënuar nga kreu i një bande të lidhur me trafikun e drogës.
Villavicencio, i cili ishte i martuar dhe kishte pesë fëmijë, ishte një nga tetë kandidatët në raundin e parë të zgjedhjeve, edhe pse jo kryesuesi.
Vrasja e tij pason atë të Agustín Intriago, kryebashkiak i qytetit Manta, në korrik dhe Omar Menéndez, kandidat për kryetar bashkie në qytetin e Puerto López, në shkurt.
