Drejtor i fondacionit të kolegjit të mbrojtjes së NATO-s, Alessandro Politi komentoi deklaratat Edi Ramës që KFOR të marrë nën kontroll veriun.
Në një intervistë për Euronews Albania, ai tha se ajo çfarë është e re dhe është zgjedhje e qeverisë së Prishtinës është që njësitë speciale janë një prezencë e pandërprerë në veri të Kosovës.
“Mendoj që të paktën nga ana e kryeministrit shqiptar Edi Rama ideja është më tepër për të thjeshtëzuar mekanizmin e përgjigjes së krizës në mënyrë që mos të jetë KFOR-i në pozicion të tretë, por të paktën në pozicion të dytë, në bashkëpunim me policinë e Kosovës.
Është e qartë që kontrolli i pikave kufitare është autoriteti i policisë së Kosovës. Është e qartë që KFOR-i është prezent në veri dhe do të vazhdojë të jetë. Ajo çfarë është e re dhe është zgjedhje e qeverisë së Prishtinës është që njësitë speciale janë një prezencë e pandërprerë në veri të Kosovës. Nuk do të diskutoja se kush po fiton dhe kush po humbet në këtë situatë shumë të vështirë, nëse është Kurti apo Vuçiç. Besoj që të dy kanë kuptuar se mënyra e vjetër për të bërë politikë nuk funksionon më dhe duhet të gjejnë një mënyrë tjetër për të diskutuar, për të respektuar në radhë të parë interesat e vendeve të tyre,” – u shpreh Politi.
