Një aksident ka ndodhur gjatë mbrëmjes të së mërkurës (24 janar) në vendin Orashac, në afërsi të Dubrovnikut të Kroacisë, ku është përfshirë edhe një autobusi me 30 pasagjerë nga Kosova.
Ministria e Punëve të Jashtme dhe Diasporës njofton se asnjë nga pasagjerët nuk është lënduar, dhe asnjë udhëtar nuk ka kërkuar ndihmë mjekësore.
Më tej MPJD shkruan se është në pritje të përditësimit të informacioneve nga ana e autoriteteve kroate në lidhje me aksidentin.
Njoftimi i plotë i MPJD-së:
Lidhur me aksidentin e autobusit nga Kosova në Kroaci, nga informacionet e deritanishme, të marra nga autoritetet kroate, Ministria e Punëve të Jashtme dhe Diasporës njofton opinionin e gjerë se rreth orës 18:00, një autobus me rreth 30 udhëtarë ka pësuar një aksident në vendin e quajtur Orashac, në afërsi të Dubrovnikut.
Sipas informacioneve të deritanishme asnjë nga udhëtarët nuk duket të jetë lënduar dhe as të ketë kërkuar ndihmë mjekësore.
Informacionet rreth këtij aksidenti do t’i përditësojmë sapo të kemi të dhëna më të detajuara nga organet kompetente kroate.
