Jamarbër Malltezi, është paraqitur në SPAK për tu marrë në pyetje lidhur me hetimin për çështjen e privatizimit të kompleksit Partizani.
Malltezi ka bërë rekurs në Gjykatën e Lartë për masën “arrest shtëpie”. Në një dalje për mediat, Malltezi lëshoi akuza në drejtim të kryeministrit Rama dhe institucioneve të drejtësisë.
Ai tha se nuk ka bërë asnjë shkelje sa i takon procedurave të privatizimit të ish-kompleksit Partizani. Ai tha se po arrestohen njerëz kot, kur nuk ka asnjë dëm.
“E para, toka ishte e pronarëve fisnikë themelues të familjeve të Tiranës.
Dy, kjo tokë nuk ishte e shpronësuar, kjo ishte e këtyre familjeve dhe mbi 100 familjeve trashëgimtare të 5 familjeve të origjinës.
Tre, klubi Partizani nuk iu kthye Jamarbër Malltezit, iu kthye 100 familjeve, është krejt ndryshe nga ato që bën Edi Rama me katër VKM që ia jep një personi. Pra, asnjë qeverisje nuk ia ka dhënë Jamarbër Malltezit apo një personi, por ia ka dhënë 100 familjeve pronare.
E katërta, në këtë çështje, edhe vetë SPAK-u e pranon se nuk ka dëm. Pra, po bëjnë hetime kur nuk ka dëm. Po arrestojnë dhe burgosin njerëz me shfaqje kur nuk ka dëm.
Sa është dëmi? Zero! Përkundrazi shteti ka përfituar 800 mijë dollarë nga privatizimi i objekteve të rrënuara.
Nga ana tjetër, çfarë ka rezultuar? Ka rezultuar se Taulant Balla ka bërë kallëzim të rremë, vepër penale e dënueshme sipas nenit 315 të Kodit Penal.
Por Taulant Balla qenka mbi ligjin. SPAK-u bëhet SNUK.
E pesta, Edi Rama ka bërë shkelje, ka bërë dëm. Shpërdorim detyre me dëm mbi 330 mijë euro. E kam administruar së fundmi se e kishin fshehur. Vetëm këto dy muajt e fundit e kanë administruar si provë, por nuk ndihen. Pse? Se është Edi Rama! Sepse është dëm që vjen nga Edi Rama dhe Edi Rama është mbi ligjin.
Këto i lëpihen, këta janë larot e Edi Ramës,”, tha ai.
Avokatët kërkojnë që Malltezi të mos ketë asnjë masë sigurie me argumentin se nuk ka kryer asnjë vepër penale për të cilën prokuroria ka ngritur dyshimet.
Ndërkohë kujtojmë se mëngjesin e sotëm Gjykata vendosi qe kryedemokrati Sali Berisha, do të vijojë të qëndrojë në masën arrest shtëpi.
Pas shpalljes së vendimit, avokati i Berishës, Genc Gjokutaj tha se vendimit do t’i bëjnë rekurs në Gjykatën e Lartë.
