Një lider “autoritar dhe i korrupruar” që për më tepër i ka tejet të dukshme “lidhjet me rrjetet e krimit të organizuar dhe narkotrafikut” po hiqet sikur po e afron vendin e tij me BE. Kështu e përshkruan media e njohur e rajonit të frengjisht “Courrier des Balkans”, Edi Ramën pas hapjes së kapitullit të parë të negociatave me Brukselin. Në artikullin e tij, gazetari me përvojë Jean Arnault Derens, autor i një tjetër analize, kohë më parë në Mediapart (shiko linkun poshtë), ku tregonte se si Rama blen mbështetjen ndërkombëtare duke sakrifikuar interesat e vendit të vet këtë herë heq një paralelizëm me presidentin serb Vuçiç.
Në teksti e lexuar nga Lapsi.al trajtohen shfrytëzimi i burimeve natyrore si litiumi në Serbi dhe marrja e emigrantëve në Shëngjin, duke vënë në dukje rolin e Serbisë dhe Shqipërisë në raport politikat e Bashkimit Evropian. Sipas tij, Serbia dhe Shqipëria, të udhëhequra nga liderë të korruptuar dhe autoritarë si Aleksandar Vučić dhe Edi Rama, kanë hyrë në marrëveshje që i shërbejnë interesave të fuqive më të mëdha evropiane, si Italia dhe Gjermania, duke bërë kompromise që dëmtojnë interesat kombëtare të vendeve të tyre.
“Edi Rama, lidhjet e të cilit janë tepër të dukshme me rrjetet e krimit të organizuar dhe narkotrafikut, gjithmonë ka nevojë “të bëhet i dobishëm” për fqinjin e tij të madh, gjë të cilën e pranon vetë, duke përsëritur se Italia do të mund të mbështetet gjithmonë te Shqipëria… Veçse Roma mbështetet te Tirana ashtu si dikush mbështetet tek një shërbëtor, të cilit sa më mirë sa ia njeh prapësitë dhe turpet, aq më shumë ia rrit nënshtrimin”, shkruan “Courrier des Balkans”. Nisur nga këtu mbërrin në konkluzionin se anëtarësimi në BE nuk është veçse një mirazh i gënjeshtërt. Dhe kjo për një arsye: “Askush nuk mund t’i konsiderojë si të barabartë shërbëtorët e tij, banorët e një hapësire të nënshtruar, rojet e një zone përjashtimi” thuhet ne artikullin e lexuar nga Lapsi.al.
Autori argumenton se premtimi për integrimin evropian është vetëm një fasadë për të kontrolluar liderët lokalë dhe për të siguruar që vendet e Ballkanit të shërbejnë si koloni të reja për interesa strategjike dhe ekonomike të Bashkimit Evropian. Ai përshkruan një vizion ku vendet e Ballkanit nuk kanë më një “vokacion” të vërtetë për t’u bashkuar me BE-në, por mbahen në një gjendje nënshtrimi për të kryer detyra të caktuara për fuqitë perëndimore.
“Është jashtë çdo diskutimi që Shqipëria të mund të shihet si me të drejta të barabarta me Italinë duke u bashkuar me të në Bashkimin Evropian, ndonëse Tirana ka hapur, në prag të mbërritjes së refugjatëve në Shëngjin, kapitullin e saj të parë të negociatave për anëtarësim në Bashkimin Evropian. Kjo duhet parë vetëm si një farsë cinike”.
Por sipas autorit kjo maskaradë mbahet gjallë për dy arsye. Së pari sepse “duhet të vazhdojë “spektakli” i integrimit për qytetarët e Ballkanit, të cilët gjithnjë e më pak po mashtrohen nga kjo lojë që po zgjat dhe së dyti për qytetarët e shteteve anëtare, të cilët ende kanë iluzionin se jetojnë në shoqëri të privilegjuara, demokratike dhe të begata, që përfaqësojnë ende një model të lakmueshëm dhe të dëshiruar në të gjithë botën”.
©Lapsi.al burimi: “Courrier des Balkans”
