Shembulli/ ‘Ne e dëgjojmë zërin e qytetarëve’/ Protestat masive në gjithë vendin: Jep dorëheqjen kryeministri, bie qeveria Bullgare
Kryeministri bullgar Rosen Zhelyazkov paraqiti dorëheqjen e tij të enjten, vetëm një ditë pasi dhjetëra mijëra qytetarë dolën në rrugët e më shumë se 25 qyteteve në protestën më të madhe mbarëkombëtare të viteve të fundit. Demonstruesit kërkuan largimin e qeverisë dhe reforma të thella, duke e akuzuar kabinetin për korrupsion të përhapur dhe ndikim oligarkik.
“Ne e dëgjojmë zërin e qytetarëve. Ky qëndrim qytetar duhet të inkurajohet”, deklaroi Zhelyazkov në një seancë të jashtëzakonshme të Asamblesë Kombëtare, duke njoftuar dorëheqjen e tij dhe të kabinetit. Ai shtoi se Bullgaria ka hyrë në një moment tranzicioni që kërkon një qeveri të re me besueshmëri të gjerë publike.
Nuk kemi dyshim se qeveria do të marrë mbështetje në votimin e ardhshëm të mosbesimit. Megjithatë, për ne, vendimet e Asamblesë Kombëtare kanë kuptim kur shprehin vullnetin e sovranit… Pushteti buron nga sovrani. Siç e kemi deklaruar vazhdimisht, ne dëgjojmë zërin e qytetarëve që protestojnë kundër qeverisë… Kërkesat e tyre janë dorëheqja e qeverisë “, tha Zhelyazkov.
Protesta masive në Sofje dhe qytete të tjera
Mbrëmjen e së mërkurës, mbi 100,000 protestues u mblodhën në qendër të Sofjes, sipas vlerësimeve nga pamjet me dron. Fjalët “Dorëheqje”, “Mafia Jashtë” dhe “Për Zgjedhje të Drejta” u projektuan me lazer në ndërtesën e parlamentit. Demonstrata të ngjashme u zhvilluan në Plovdiv, Varnë, Veliko Tarnovo, Razgrad dhe qytete të tjera, si dhe në diasporën bullgare në Evropë dhe SHBA.
Studentët e universiteteve të Sofjes iu bashkuan protestave, ndërsa organizatorët thanë se pjesëmarrja tejkaloi tubimet e javës së kaluar, që kishin mbledhur rreth 50,000 vetë.
Zemërim ndaj ndikimit oligarkik
Protestuesit kanë drejtuar akuzat e tyre kryesisht ndaj oligarkut dhe politikanit Delyan Peevski, figura e të cilit ka dominuar peizazhin politik dhe mediatik bullgar për më shumë se një dekadë. Peevski është sanksionuar nga SHBA dhe Mbretëria e Bashkuar për korrupsion dhe ndikim të paligjshëm në institucionet shtetërore.
Edhe pse partia e tij DPS nuk është pjesë zyrtare e koalicionit qeverisës, votat e saj në parlament janë vendimtare, gjë që, sipas kritikëve, i ka lejuar Peevskit të ushtrojë ndikim të madh mbi politikëbërjen.
Përshkallëzim politik
Opozita “Ne Vazhdojmë Ndryshimin – Bullgaria Demokratike” kishte kërkuar një votë mosbesimi për të enjten, por Zhelyazkov dorëzoi mandatin pak para votimit, duke shmangur një përballje të hapur në parlament. Presidenti Rumen Radev e përshëndeti protestën si një “votë mosbesimi nga qytetarët”.
Policia arrestoi 67 persona në Sofje, disa prej të cilëve dyshohen se ishin provokatorë.
Në prag të hyrjes në eurozonë
Dorëheqja e kryeministrit vjen më pak se një muaj para se Bullgaria të bëhet anëtarja e 21-të e eurozonës më 1 janar, duke adoptuar euron në vend të parasë vendase. Sipas një sondazhi të Ministrisë së Financave, vendi mbetet i ndarë mbi këtë hap historik: 46.8% kundër dhe 46.5% pro.
