Këshilli i Lartë Gjyqësor (KLGJ) ka reaguar pas deklaratave të kryeministrit Edi Rama, i cili akuzoi disa gjyqtarë të GJKKO për ndarjen e informacionit të dosjeve hetimore me opozitën, duke shkelur ligjin.

Në një komunikatë për mediat, KLGJ shprehet se po ndjek me vëmendje zhvillimet e fundit dhe thekson se çdo tentativë për të ushtruar trysni apo presion mbi gjyqtarët është një kërcënim serioz për pavarësinë e gjyqësorit, demokracinë dhe sundimin e ligjit.

Këshilli bën thirrje për shmangien e çdo forme presioni ndaj gjyqtarëve dhe thekson se pavarësia e gjyqësorit është thelbësore për funksionimin e shtetit të së drejtës dhe për mbrojtjen e lirisë dhe të drejtave të qytetarëve.

DEKLARATA E KLGJ:

“Këshilli i Lartë Gjyqësor ka ndjekur me vëmendje zhvillimet e fundit në lidhje me deklaratat e bëra nga persona të veshur me pushtet, ekzekutiv apo politik si edhe media të caktuara, të cilat prekin figurën dhe dinjitetin e gjyqtarëve pranë gjykatave të posaçme për korrupsionin dhe krimin e organizuar. KLGJ mban qëndrimin se çdo përpjekje për të cënuar pavarësinë e gjyqësorit, nëpërmjet trysnisë apo presionit të çfarëdo lloji, përbën një kërcënim të drejtpërdrejtë ndaj pavarësisë, demokracisë dhe sundimit të ligjit.Këshilli në përmbushje të angazhimeve të tij ligjore, ju bën thirrje të gjithë aktorëve që të shmangin trysninë në formën e deklaratave, citimeve apo aludimeve që cënojnë gjyqtarët për shkak të ushtrimit të funksionit.

Në një shtet të së drejtës, pavarësia e gjyqësorit është një ndër shtyllat themelore për garantimin e drejtësisë dhe mbrojtjen e të drejtave dhe lirive të qytetarëve. Gjyqtarët duhet të jenë të lirë nga çdo lloj forme që ndërhyn në vendimmarrje, në mënyrë që të ushtrojnë detyrën në përputhje me Kushtetutën dhe ligjet në fuqi.

Këshilli thekson se në një shtet që është duke përmbushur kriteret e anëtarësimit në BE, mënyra e vetme e kundërshtimit të një vendimmarrjeje gjyqësore duhet të jetë përmes ushtrimit të mjeteve ligjore, duke u ankuar në një gjykatë më të lartë”