Lapaj “ndërron mendje”, heq babain si kryesues të listës në Berat
Adriatik Lapaj duket se ka tentuar të adresojë kontradiktën që u krijua në raport me listat e kandidatëve për deputet të koalicionit të tij “Nisma Shqipëria Bëhet”.
Babai i tij, Ferman Lapaj nuk është më deputeti i parë në listën e Shqipëria Bëhet në Berat.
Lajmi se babai i tij, Ferman Lapaj, ishte kryesues i listës së koalicionit në Berat bëri menjëherë xhiron e mediave.
Ferman Lapaj nuk është më deputeti i parë i Shqipëria Bëhet në Berat. Ai nuk figuron më në listën e finalizuar në KQZ. Është Aleksander Bacaj ai që kryeson listën në qytetin e Beratit.
Në një reagim në rrjetet sociale, Lapaj ditën e djeshme u përgjigj duke thënë se po përdorej kundër tij një listë paraprake dhe se kandidimi i njerëzve të besuar në listat e mbyllura është forma se si Shqipëria Bëhet po refuzon listën e mbyllur. Sipas Lapajt, kandidatët realë janë në listat e hapura, dhe në rast fitoreje të mandatit, ato njerëz të besuar në listë të sigurt do të tërheqin emrin për të lejuar kandidatin nga me më shumë vota nga lista e hapur të marrë mandatin.
Por kjo paqartësi nga koalicioni Lapaj-Shabani ka shkaktuar një furtunë të vërtetë. Listat e “Nisma Shqipëria Bëhet” shkaktuan kontradikta ditët e fundit. Përveç rastit të babait, lajm bëri edhe marrëveshja e lënë përgjysmë e minutave të fundit me Dash Sulën, deputetin e zhgënjyer të Partisë Demokratike, me kritikë që e quajtën pazar të prishur.
