Kamerat ruajnë kur voton Dumani’, Tomorri: Pse SPAK nuk ndërhyri kur bandat kishin rrethuar Vorën…

Nga Klodian Tomorri/

Shqipëria është vend shumë i çuditshëm.

Mediat kishin vënë kamerat të gjitha duke transmetuar live se po votonte drejtuesi i SPAK.

Por askush nuk shkoi t’i vinte mikrofonin dhe ta pyese se pse SPAK nuk ndërhyri kur bandat kishin rrethuar Vorën.

Pse SPAK nuk ndërhyri kur një agjenci e tërë shtetërore, e cila duhet te ishte pararoja e zhvillimeve teknologjike dhe inovacionit në vend, ishte shndërruar në zyrë elektorale ilegale e qeverisë.

Aty ka dyshime të forta se ka patur para dhe materiale të jashtëligjshme.

Si ka mundësi, që stafi i asaj agjencie nuk është arrestuar akoma.

Njerëzit e kanë të qartë se policia e shtetit është zgjatim i maxhorancës dhe ortake e krimit. Por sot fatkeqësisht dëshmuan në rastin më të mirë dështimin e SPAK për të parandaluar dhe më pas ndëshkuar krimin zgjedhor flagrant të dokumentuar me zë dhe figurë.

Në rastin më të keq, mosdëshirën e SPAK për të ndërhyrë.

Ndërkohë kamerat shkojnë dhe ruajnë kryeprokurorin kur voton. Se kujt i duhet kjo.

E megjithatë, me sa duket Vora i paska mundur të gjithë. Bandat, policinë dhe edhe vetë SPAK-un.