Kjo foto e mistershme thuhet se është realizuar në vitin 1940 në varrezat e Bogës në Shqipëri. Në pamje duket një fëmijë mbi një varr të vjetër me kryq dhe një shpatë në dorë.
Fotoja është publikuar në “Facebook” nga Çapajev Gjokutaj i cili shkruan: “Foto e bërë në vitin e largët 1940 në varrezat e Bogës. Vras mendjen pse më josh kjo fotografi. Imazhi i varrezave ngjall gjithnjë emocion: vdekje, dhimbje, mall… Gurë varri dhe kryqe, përkohësi dhe përjetësi… Në këtë foto kuptime të tilla mbeten në periferi. Në plan të parë del fëmija. Jetim? Tek varri i nënës? Varfëri… Kryqi në dorën e tij dhe lodrat në duart e fëmijëve sot… Kush ishte dhe ku është, në se është? Nga vijmë e ku shkojmë?… Ndruaj se, po të ishte bërë me teknikat e sotme dhe me ngjyra, nuk do të më ngashënjente kaq shumë. Mbingopje nga fotografia e celularëve? Epërsi e teknikave të vjetra? Apo ligështim nga rrjedhja pa mëshirë e kohës?…”.