Lajmi është bërë i ditur nga vetë përfaqësuesit e PE dhe ambasadori i BE-së në Tiranë Soreca, i cili u shpreh se ditën e nesërme do të ketë një konferencë për shtyp.
Delegacioni i Parlamentit Evropian pritet që të japë konluzionet e mbledhura nga takimet me krerët e politikës shqiptare ditën e nesërme.
Gjatë takimit që u zhvillua këtë të mërkure me Ministrin e Brendshëm Sandër Lleshaj, nuk pati detaje në lidhje me çfarë është diskutuar mes Ministrit dhe përfaqësuesve të PE-së.
Në përfundim të takimit Lleshaj nuk dha asnjë koment për median, pavarësisht interesit të madh të gazetarëve një ditë pas protestës së opozitës përballë parlamentit, ku elementet e dhunës nuk munguan.
Delegacioni i kryesuar nga Tunne Kelam dhe i përbërë nga Cristian Preda, Knut Fleckenstein, Juan Fernando Lopez Aguilar, Bas Belder, Ilhan Kyuchyuk dhe Tamás Meszerics, do të qëndrojë edhe për ditën e nesërme në Tiranë.
Ndërkombëtarët deri më tani janë shprehur të gatshëm për ndjërmjetësimin e krizës politike mes maxhorancës dhe opozitës, por mbetet ende e hershme të thuash nëse është arritur ndonjë pakt mes palëve apo ndonjë marrëveshje për të nisur ndërmjetësimin mes kërkesave të shtruara në tavolinë nga opozita.
Në takimin e tij me ndërkombëtarët, lideri i opozitës Lulzim Basha është shprehur se zgjidhja e vetme mbetet një qeveri tranzicioni pa Ramën. Basha theksoi po ashtu se ka patur një takim të hapur me ndërkombëtarët dhe ku gjërat janë thënë shkoqur.
