Edhe këtë të dielë pensionistët dhe prindërit me fëmijët deri në 14 vjeç kanë mundësi të shijojnë lirinë. Për pensionistët liridalja është deri në orën 10:00, ndërsa për prindërit dhe fëmijët nën 14 vjeç do të kenë mundësi të lëvizin nga ora 11:00 paradite deri në 17:30 të pasdites. Ndërkohë, sot në të gjithë vendin do të janë të mbyllura të gjitha aktivitetet.
Ndërsa, nga nesër hyjnë në fuqi disa masa të tjera lehtësuese, pasi do të rifillojnë aktivitetin e tyre parukeritë, berberët, klinikat dentare dhe dyqanet në qendrat tregtare, por duke ruajtur distancimin social dhe me vetëm 1 klient apo pacient në radhë.
Kryeministri Edi Rama njoftoi pak ditë më parë se pas 11 majit do të mbeten në zonën e kuqe bashkitë Tiranë, Durrës, Fier, Shkodër, Kurbin, Krujë, dhe në këto zona do të jetë në fuqi i njëjti regjim oraresh. Ai theksoi se këto zona do të blindohen me postblloqe dhe nuk do të lejohet hyrje-dalja e automjeteve të paautorizuara. Sipas tij e gjitha pjesa tjetër e vendit do të jetë e gjelbër dhe do të lejohet qarkullimi ndërqytetas me automjet privat deri në orën 21.00 të mbrëmjes.
