Me anë të një ceremonie solemne, Presidenti i Republikës, Ilir Meta vlerësoi me Titullin e lartë “Mjeshtër i Madh” tre kampionë të Klubit të Futbollit “Tirana”:
Ish-mesfushorin e njohur, kapitenin Pavle Bagaviki (Pavllo Bukoviku)
“Me mirënjohje për kontributin e vyer dhe personalitetin e gjithanshëm të treguar gjatë karrierës së tij futbollistike, duke dëshmuar cilësi të shkëlqyera si lojtar me ekipin ‘17 Nëntori’ dhe Ekipin Kombëtar; me rezultate të larta në veprimtaritë kombëtare dhe ndërkombëtare.”;
Portierin e pakalueshëm Bujar Tafaj “Në vlerësim të kontributeve të shquara si portier i ekipit ’17 Nëntori’ dhe i Ekipit Kombëtar, duke shënuar rezultate të larta në veprimtaritë kombëtare dhe ndërkombëtare.”;
si dhe mbrojtësin legjendar, Perikli Dhales (pas vdekjes) “Me mirënjohje për veprimtarinë e spikatur në futboll, si lojtar i formacionit kryesor të ekipit ’17 Nëntori’ dhe i Ekipit Kombëtar, me rezultate të larta në arenën kombëtare dhe ndërkombëtare; i dalluar si një mbrojtës i jashtëzakonshëm me cilësitë e tij të rralla e të shkëlqyera fizike dhe teknike”.
Në fjalën e Tij përshëndetëse, Presidenti i Republikës duke iu drejtuar të sportistëve të dekoruar dhe familjarëve, miqve dhe kolegëve të tyre, u shpreh:
“Futbolli ka nderin të ketë në historinë tij skuadrën e ‘Tiranës’, që me rezultatet dhe futbollistët e saj lartësoi jo vetëm emrin e kryeqytetit tonë, por dhe të mbarë futbollit shqiptar.
Përfaqësimi dinjitoz dhe rezultatet e larta të arritura në ndeshjet kombëtare dhe ndërkombëtare, si përfaqësues të asaj gjenerate të artë, do të mbeten gjithmonë në kujtesën e sportdashëve tanë.
Pa dyshim mund të them se ju jeni krenaria e kësaj skuadre dhe e sportit tonë.
Kam nderin të vlerësoj disa nga futbollistët e spikatur të këtij ekipi, që me lojën dhe shpirtin e garës së tyre kujtohen me shumë dashuri nga të gjithë sportdashësit, tifozët dhe nga mbarë opinioni sportiv.
Është kënaqësi të nderojmë me Titullin e lartë ‘Mjeshtër i Madh’ dhe t’i urojmë edhe 100 vite të tjera futbollistit Pavllo Bukoviku ose të mirënjohurit Ben Bukoviku, kampion dhe futbollist i shkëlqyer, pjesë e asaj gjenerate, që i riktheu lavdinë “Tiranës” apo ‘17 Nëntorit’.
Ai është trashëgimtar dinjitoz i traditës sportive të një familje të njohur të Tiranës, që i ka dhënë shumë si futbollit bardheblu, ashtu dhe atij kombëtar, duke u shpallur 6 herë kampion kombëtar dhe fitues i 2 Kupave të Republikës.
Bukoviku është dalluar në ndeshjet ndërkombëtare për Kupën e Kampioneve dhe në përfaqësimet me Ekipin Kombëtar, duke qenë njëkohësisht edhe një golashënues i suksesshëm.
Kënaqësi gjithashtu të nderojmë sot z.Bujar Tafajt me Titullin e lartë ‘Mjeshtër i Madh’, portierin e jashtëzakonshëm të skuadrës ‘17 Nëntori’ dhe të Ekipit Kombëtar.
Si “gardiani” i portës Tiranase të viteve 60, ai ka mbetur në kujtesën e sportdashësve për performancën e lartë sportive.
Bujar Tafaj ka mbrojtur portën e “Tiranës” në 12 takime ndërkombëtare dhe është shpallur 3 herë kampion i vendit.
Perikli Dhalesin, që na mungon sot, një legjendë e futbollit bardheblu dhe atij kombëtar, kemi kënaqësinë ta nderojmë sot me Titullin e lartë “Mjeshtër i Madh”. Një sportist i jashtëzakonshëm që nuk e kemi midis nesh, por të gjithë e kujtojmë, si një nga futbollistët e spikatur të ekipit ‘17 Nëntori’ dhe Ekipit Kombëtar.
Një mbrojtës shumë i vlerësuar në rininë e tij, që shkëlqeu për dy dekada, duke u bërë dhe pjesë e ekipit Kombëtar.
Ai ishte lojtar i formacionit kryesor të një brezi fenomenal te Tirana, me emra të mëdhenj si Ali Mema e Fatmir Frashëri në fillimet e karrierës së tij, dhe me Mingën apo Muçën në fundin e karrierës.
Dhales është fitues i titujve Kampionë dhe i Kupave të Shqipërisë, falë shpirtit kolektiv dhe punës shembullore, që ka kryer ai vetë në skuadër.
Perikli Dhales ka qenë gjithashtu pjesë e Kombëtares së Shqipërisë duke treguar vlerat e tij në të gjitha veprimtaritë ndërkombëtare dhe sidomos në atë ndeshje të paharruar me Gjermaninë, ku Loro Boriçi vendosi të përjashtojë Berishën e “Partizanit” dhe vendosi Dhalesin për shkak të cilësive të tij të veçanta.
Prandaj sot nderoj me respekt, këtë emër të madh dhe të paharruar, që i ka dhënë gjithçka në karrierën e tij të mrekullueshme, “Tiranës” dhe futbollit tonë kombëtar.
Vlerësimin më të lartë për të gjithë ato gjenerata, që themeluan dhe i dhanë shkëlqim futbollit të kryeqytetit dhe atij kombëtar, që nga i madhi dhe i jashtëzakonshmi Selman Stërmasi, Myslym Alla, Xhavit Demneri, Enver Shehu, Fatmir Frashëri, Shkëlqim Muça, Sulejman Mema, e shumë e shumë yje të tjerë.
Një mirënjohje dua t’i përcjell familjeve tuaja të nderuara, që kanë qenë gjithmonë pranë jush në sakrifica dhe suksese, por dhe që janë ndjerë krenare për ju.
Ju falënderoj për kontributin tuaj, për përgjegjësinë dhe sukseset e arritura, për besimin dhe kënaqësinë që i dhatë gjithë tifozëve të ‘Tiranës’ dhe të mbarë sportdashësve të futbollit shqiptar!
Përzemërsisht, ju uroj të gjithëve shëndet dhe mbarësi!
Suksese të mëtejshme ‘Tiranës!”, tha Presidenti.
