Ditën e sotme ka patur spekulime nga disa media, për dorëheqjen e Gledis Nanos nga detyra e Drejtorit të Përgjithshëm të Policisë së Shtetit, madje disa prej tyre e bëjnë largimin e tij fakt të kryer.
Policia e Shtetit ka qenë në qendër të vëmendjes pas ngjarjeve të rënda kriminale dhe atentateve mafioze gjatë kësaj vere.
Së fundmi, arrestimi i agjentit të Forcave Operacionale, Jeton Lami, si shoqërues i të shumëkërkuarit Ervis Martinajt, duket se e ka thelluar njollën mbi Policinë e Shtetit.
Po kështu edhe fakti që mediat vijojnë të spekulojnë për fatin e Martinajt, ndërkohë që Policia nuk ka asnjë reagim dhe qartazi nuk ka asnjë konkluzion se çfarë ka ndodhur me bosin e krimit, e kanë errësuar më tej imazhin e këtij institucioni.
Opozita kërkoi dorëheqjen e Nanos, pas masakrimit të 7 vjeçares Jonada Avdia me skaf, nga ish oficeri Arjan Tase. Po kështu, Partia Demokratike ka qenë mjaft kritike ndaj punës së Policisë së Shtetit, pas një vargu atentatesh mafioze që tronditën vendin gjatë kësaj vere, me autorë të paidentifikuar që vijojnë të jenë të lirë.
