Është ndarë nga jeta Edmir Kapidani, mbështetës i hershëm i PD, që ka mbajtur dhe poste të ndryshme në administratë.
Lajmin e hidhur e ka bërë me dije Partia Demokratike me anë të një postimi në rrjetet sociale. Edmir Kapidani ka qenë drejtuesi i Degës së Durrësit për tre mandate, vitet 1992-1994, 1998-2001, 2001-2004.
Po ashtu ka qenë anëtar i Këshillit Bashkiak Durrës në zgjedhjet e para të vitit 1992, zv. Ministër i Arsimit dhe poste të tjera në administratë.
Postimi i plotë i PD:
U nda nga jeta Edmir Kapidani apo siç e njohën te gjithë Ed Kapidani.
Ed Kapidani ishte nga një familje e nderuar durrsake, një bashkëshort i shkëlqyer, prind i 3 fëmijëve të mrekullueshëm.
Mbështetës i hershëm i vlerave demokratike. Përfaqësues i denjë i Partisë Demokratike në ditët më të mira, por dhe në kohët më të vështira të saj.
Drejtues i saj në Degën e Durrësit për 3 mandate, vitet 1992-1994, 1998-2001, 2001-2004, ku spikati me ndershmërinë, qytetarinë dhe meritokracinë.
Anëtar i Këshillit Bashkiak Durrës në zgjedhjet e para të vitit 1992, zv. Ministër i Arsimit dhe poste të tjera në administratë, duke lënë një trashëgimi për brezat në vijim.
Edi me karakterin dhe fisnikërinë e tij i dha Durrësit dhe Partisë Demokratike vlera dhe kontribut të vyer. Ai do të kujtohet nga të gjithë si një qytetar i guximshëm për të mbrojtur idealet e tij, i ndershëm, një drejtues i aftë, si dhe një mësues i përkushtuar që ka formuar breza të tërë.
Familja humbi njeriun e tyre më të dashur, Durrësi humbi një simbol të qytetarisë, Partia Demokratike humbi një prej kontribuesve të saj të vyer.
Lutjet tona janë me familjen, të afërmit, miqtë e dashamirët e tij të shumtë.
U prehtë në paqe!
